O 9 de marzo, Elisa Pérez, portavoz da Rede Social Popular (R.S.P.), comparecerá nos xulgados de Vigo en calidade de imputada por un suposto delito de usurpación da propiedade. En setembro de 2014 Elisa xunto a outras persoas iniciaron a transformación  dun antigo chalé abandonado no número 73 da rúa Hispanidade de Vigo nun centro social.

O día da presentación do Centro Social da RSP, a policía identificou como voceira a Elisa e, despois dun tempo, un dos propietarios legais do inmoble, decidiu emprender medidas legais sen sequera dialogar coas persoas que dinamizan o centro social. O resultado é a imputación de Elisa por un suposto delito de usurpación da propiedade, co que se enfronta a unha pena de cadea de ata 2 anos.

O Centro Social da RSP, é un espazo liberado, aberto á cidadanía onde se levan ao cabo distintas actividades que teñen como base a dignificación e o traballo solidario entre as persoas que as conforman. A RSP Vigo e por extensión o centro social que se constrúe ao seu redor, son proxectos que nacen nun contexto social, político e económico no que, cada día que pasa, a consecución dos beneficios empresariais xustifica todo tipo de medidas contra a cidadanía. O esnaquizamento dos dereitos máis básicos xera vieiros alternativos de construción social que evidencian a falta de vontade para aplicar as solucións ao tempo que teñen como base, dende ópticas diferentes, a dignificación e o exercicio dos dereitos cara a vertebración dun sistema máis xusto.

ECOAR))) súmase aos centos de voces que ven esta situación como totalmente inxusta, e fai un chamamento a toda a cidadanía e colectivos sociais a solidarizarse con Elisa dándolle todo o noso apoio, tanto o día 9 de marzo ás 10:15 na concentración que terá lugar nos xulgados de Vigo, como nas posteriores mobilizacións que xurdan.

 

 DEMOCRACIA FRONTE “OS MERCADOS”

MOBILIZAR + CONVERXER + CONSTRUÍR

PENSA – ACTÚA – ORGANÍZATE

ECOAR)))